Taratasy ihany

Taratasy ihany

na hivadika hatanjaka ny teknolojia, handroso ny hai-tao
izao ry poeta, no teny sy mba hafatra zaraiko aminao
an-taratasy ihany, tehirizina ny teny sy ny sora-tanana
fa iny no mandafo, ny hasarobidin’ilay ainga tsy notanana

na ho varatra sy henjana, ny fitaovam-pitahiry, hanaraka lamaody
iny fitaovana iny, hiova isan-taona, ka tsy maintsy maody
an-taratasy ihany, tehirizina ny soratra, sy ny rango-penina
ambony ampanga iny, amin’ny fitadidy, sy ny zavatra tenenina

satria ilay taratasy, nitaty dinitr’ainga, fony ilay niranga
ny vinany diso fantsika, ka nampiarinarina ny vetso ho mangamanga
satria ilay taratasy, nadio nanaiky hizara, ny embonao adala
ireo ranomaso latsaka, ireo vinitry ny fo, ireo sento izay niala

ka na ho tonta aza, na ho rovi-tsisiny, na hiforiporitra
ny boika izay avoakany, rehefa any aoriana, hitanao hisoritra
hamohafoha indray, ilay ainganao nandalo, nitady fanaperana
hisentoanao indray, ilay fotoana mamy, nandalo dia niserana

 

Raozigasy Serasera

TIA sy ireo tononkalon’i Raozigasy

TANTELY AFA-DRAKOTRA

TANTELY AFA-DRAKOTRA

Raha lasa ilay mamba
Izay natao hoe vangavanga
Dia nisosoka ny voay
Biby ratsy mpanafay

Nogejaina ireo vokatra
Dia naondrana ny sokatra
Izy ireo tsy te ahalala
Fa mandripaka ny ala

Tonga indray ireo fangolika
Mba hangalatra ny solika
Mody hoe fanadihadiana
Hay tena habibiana

Ireo izay tsy miandany
Ka miseho ho sahisahy
Dia samborina avy hatrany
Mba hameno an’i Tsiafahy

Ny vatosoa sy volamena
Izay tena betsaka tokoa
Tsisy hoan’ny firenena
Fa manjavona avokoa

Nokaramaina ireo dahalo
Mba hamono sy handrangitra
Ianareo ry fahavalo
Matahora an’Andriamanitra

Nosoratan’i namana Valiha Babah tamin’ny 13/09/2012, ary isaorana azy manokana ny nanomezany alàlana hamoahana azy eto amin’ny bilaogy.
Araka ny voalazan’ny mpanoratra dia efa hivoaka tsy ho ela amin’ny endriny HIRA ity tononkalo ity. Inoantsika fa ho kanto dia kanto tokoa.